Hmuh Thiang Lo Hmu Tu Pi Darchuani.......!!!!!! By Isaac Zote

Thal lai a nih avangin khua a ro hle a. Tih dan phung pangaiin Dar-i te thian dun pawh thing phur rual tih takah, an thian dun chuan ram lama thing phur paha, chhungkaw chakkhai eng ilo phur turin an tlai chhuah dun leh ta hnak hnak a. Hemi te 2 hi khawi ilo kal chhuahna reng2-ah pawh in zui deuh chawt thin an nih bakah, thian in ngaina tak an nih avangin chumi tlai-a an thing phurhna tur kawngah pawh chuan, an khaw tlangval hmeltha leh chhe lo an tih zawng deuh te sawiin an nui dun ar ar mai a. Amaherawhchu, hemi ni hi kum khua atana an thian dun inthenna ni tur, tih lam reng erawh an ngaihtuah bik hauh lovang le!

Hlim taka chutianga an kal zel lai chuan an thing phurhna tur peng chu an lo thleng ta reng mai. Upa deuh zawk a nih avangin Rovi chuan hma a’n hruai a, kawng thlang lamah chuan an peng chhuk a. Mi lo ram tawh hi an zu pawh thla a, lo lu lam chu zawh dun zelin ngaw chhung lam pan chuan an in zui phei ta hnak hnak a. A kawng lah chu a lo rualrem lo phian lehnghal nen! A hmun an va thlen pawh chuan hmun khata awm dun lovin Rovi zawk chu Dari awmna atanga hla vang si lo, thlang lamah chuan a zu chhuk thla deuhva.

Ngaw pik karah chuan Ngirtling an kiu vung vung a, Vahrit leh Ramar an in chhawn karh2 bawk a. A khat tawkin Mulek nupa an in chhaih ri kar2 bak chu thawm dang han hriat vak tur a awm lo. Zai deuh rat rat pahin Dari chuan a mamawh ang tur chu Em-ah chuan a’n thawlh lut zung zung a, rei ngial lovin ani chuan a ngah ta thuai bawk a. Chutia a zawh hnu chuan thlang lam a zu hawi a, thing kung hliah deuh chiah2 kara a thiannu lo la kun turh2 chu a zu hmu vuai vuai a.

‘A la zo ve lo anih dawn hi!’ ti rilru ang reng tak chunga zu thlek dak dak pahin leh ring leng lawng hian, ROVI ROVI, U RO, I LA.......ZO... a zu ti chu le....thawklehkhat-ah a awmna chhak lam hnim pik kar atang chuan patling aw thum vin zet hian TUNGE MIN KO....TUNGE MIN KO? a rawn ti treng ta chhuai2 mai le! Aw rawn chhuahna lama hnim hnah te lah chu a titu hmuh theih si loh hian a rawn in pal ri chhuk ang buan2 a! Tlai lam khaw dul ruih tawh lama ram pil rila chutianga hmuh theih si loh mipa thinrim aw vin han hriat thut mai chu(h);

hmeichhe awm-nem zawk tan zawng tupawh nise a hmel hmuh hma hauh atang pawhin mahni sa him na tur lo zawn nghal chuk chuk chu thil awm reng pawh a ni! Hlauh nakalaiin chu aw ri leh thawm chuan Dar-i lam a la rawn pan chhuk ta deuh2 a! A thiannu pawh ngaihtuah hman tawk hek lo le! Tha khur zawih2 in rem leh rem lo hian Dar-i chuan hnim pik kar a lo chuh ve nghal rawk rawk bawk a. A rawn hnai tial tial a, thawm a nasa tual tual a, a thaw ri/rum ri lah chu a ring tial tial bawk nen, a zawn a rawn thleng chuan chu thil chu a ding ta reng mai!!!!!!!!!

Tunge/enge a nih tak lah hriat bawk si loh, chutiang taka rawn thawngtu chu hlau chung chung leh hmai hup chunga kut kara atanga Dari’n a han en nak chuan leh!!!!!! Mihring tupaw’n hmuh nawn leh atan an duh tawh lo tawp ang tih tur khawpa hmul phurh chhia leh rimchhia, a ke te lah chu Vai Pathian Ngun-Hnam ang zuiha kual, a taksa hmuh theih chin zawng erawh saruak ngal ngat nia lang si, hmul dum kir chuat-in a tuam chuah vek si hian, a bulah chem sei tak a lo lek vulh vulh vang pawh a ni mahna, a kawng achin chunglam erawh a en chho ngam tawh lo!

Enge a sawi tih hriat theih si loh hian a trawng ri bul bul a, a trawng kar lakah a thaw ri hrup hrup bawk nen. Chulai hmuna a din reng avang chuan Dar-i chuan a chungah eng thil nge thleng dawn? tiin a lo ngaichang reng a. Amaherawhchu vanneihthlak takin a bula ti ta reng lo chuan a che hrut a, thlang lam pan chuan a ri thla leh ta buan2 mai a. Chuta chin erawh theh hmeh ang hlauh a ni a, a reh hian a reh tlawk2 a. A hmaa Thereng hram te lah chu an hram zual pui hun a in tan dawn chauh tihah an reh duak mai chu thil awihawm loh zawk tak a ni! Thawm ri-va dang engmah hriat zui tur a awm ta lo.

A tawmna hnim kar atang chuan Dar-i chu a la chhuak mai ngam lova. Hriat loh karah zun a lo cheh huh dup tih erawh a in hrechhuak thuai. Chu thil erawh a thiannu awmna lam pana a kawi thlak vut hnuah a reh ta vang vang kha a ni si a, chungte tak chuan alawm Dari ngaih ti tha lo lehzual. Tap ri ngam si lo hlau bawk siin, a thiannu ngaihtuah ve tho bawk si chu a tawmna atang chuan thawm dim takin a va chhuak phei tham tham a, a hmaa a thiannu a zu hmuh theihna Sawntlung pawng atang chuan a zu bih thla leh vak vak a. Mit tlin tawk-ah pawh a Emping lo let ngat tih loh chu, amah tak hmuh tur a awm tak si loh avang chuan rilru khing bai tak chungin chak thei ang berin a Em pawh phur ta lem lo chuan a tlan haw ta nal nal a.

Tap aw leh hlau aw nen khua ami te a va hrilh chu thenkhat lo awih lo tawk lah bo lo. A khawnawt-in an buai ta chur chur mai le! Upa deuh ten an han rel hnu chuan, ni tlak fel hma ngeia va zawn leh tha an ti a. Rovi lam tur chuan tlawmngai thenkhat in hawr khawm an va kal leh ta a. Amerawhchu chuta chin chu Rovi chu he khawvelah hian hmuh theihin a awm leh tawh ngai lo a ni.

(Ps : Pitar/putar te’n an vanglaia an thil tawn leh an chanchin an sawi hi ngaihthlak a nuam ka tih thin avang hian ka zawt nasa thin khop mai a. He thu pawh hi kan kawmchhak-a upa lam tawh tak, Pi Darchhuanthangi’n an tleirawl lai thil min hrilh atanga ka rawn ziah chhuah a ni.)