Shillong To Aizawl Ghostbuster Nen By Isaac ZoTe

Pawl 11 Shillong ah ka zir thin a, December thla khaw vawt tawh tak hnuaiah chuan Sumo a Aizawl lam pan a haw turin ka in singsa ve ta a, thiante haw pui tur ka neih bok si loh avang chuan ka peih lovin zin kawng a thui tur zia te chu ka ngaihtuah nauh nauh a..Sumo Counter ka thlen chuan ka chuanpui tur te chuan min lo nghak tawh a, tichuan shillong atang chuan zing hma takah chuan kan chhuak ta a...
 
Kan tlan zel a, tumah kan tawng lem loh avang chuan a boring in zin kawng a thui duh ngei mai..Jowai kan pelh chuan titi eng eng emaw ho te te kan sep tran a, tlem chuan a zia deuh a...Ladrymbai vel kan pelh atang chuan engemaw ti ti in  Thlahrang/Ramhuai chanchin lampang kan discuss chho tran ta a, ka tui zawng a lo ni kher bok nen a nuam ka ti tran ta phian a..

Chu tia kan han sawi tran vel takah chuan ka bul chiah a thru Patling, lian vak lo,thau ve deuh lampang chuan tawnhriat a neih ve nual tawh thu leh thawk khat lai tak phei chuan "Ghostbuster" a intih ve ngat thin thu a rawn sawi chhuak mauh mai a.. Kei lah pek chuan remchangah la in " Han sawi la enge i tawn hriat te chu" ka lo ti vat pek a..Ti hian a chhunzawm ta a...
 
"Ka huai viau e phei chu ka ti lem lo na in miten thilmak an sawi ang hi chu hriatfiah tum ve zel thin mi hi ka ni hrim hrim a.. Chuan thilmak tam tak pawh hi ka hmu tawhin ka tawng ve tawh reng bok a..Thilmak tam tak, thlahrang emaw ramhuai emaw anga mi tam takin an puh mai ang te hi han chhui chian chuan a tam zawk te hi chu thil ho te an lo ni duh a..an zavai chuan anni e ka tihna phei chu ani hran lo..chung ho thenkhat te chu kan sawi ve mai mai ange..

Seling daiah ka e !! :-

Vawikhat chu Sumo in Seling atangin Champhai lam panin chuan chhoh ka tum a, Sumo tlan pangai ka hmu thei lawk lova mahse a hnu ah ka vanneih a siamin Sumo 1 passenger tuma chuan lohna (A service lo aniang) ka hmu fuh a, a chuan chhoh ve theih em ti a Driver ka han zawh chuan saitual thleng chiah a kal tur thu leh ka duh chuan rawn kal ve mai turin min ti ta a.. a tlai deuh tawh bok a, saitual thleng chuan chhoh a, a tuk zing hma tak a champhai lam motor danga pan leh mai ka rilruk ta a...tichuan driver nen chuan kan pahnih chuan kan tlan chho ta a..

khua pawh a thim tha tawh ang reng khop mai a..Mahse Seling kan pelh hnu reilote ah chuan kan motor chu a chhe ta tlat mai a..kan han check chiang chu a part pakhat hi a lo chhe reng hi a lo ni a, Driver chuan part chhia ang chu a thar lei tur kan rawn kal pelh tawh Selingah chuan a awm mai a rin avang chuan Bike rawn tlan remchangah chuan a bet chho ta ringawt mai a, tih ngaihna vak a awm bok si loh avang chuan keimah chauh chuan driver chu ka lo nghak ta tlawk tlawk mai a..

Kan motor chhiatna lai chu seling atangin a la hla vak lova, a khaw dai te pawh a tih theih awm e..reilote ah chuan ka ek a chhuak ta tlat mai a, hla vak lova in fal reih rawih taka awm atang chuan eng (Light) a rawn det avang chuan ek in an neih ringin ka zu pan ta chawt mai a..Ka han zawh vel chuan an kawmthlang hla tham fe, ramhnuai a dap in chhe te chu min kawh hmuh ta a, an ek in hi a falin  a hla reuh phian lehnghal a, chhuk char2 a ngai zui bok a.. ka ek a chhuak tawh deuh bok nen ka pan ta ngauh2 mai a..
 
Chutia ka zu thleng thla kan thru fel deuh chiah tih ah chuan pawn atang chuan naupang aw hian "Ka Pu, ti zo vat teh ka ek a chhuak ve ania" hi a rawn ti mauh mai a...Kawngkhar nei mumal lo mahse puan chhe te an zar ve avang chuan a hmel ka hmu tha thei fum fe lova..A ramhnuai tawh ropui mai si a ek in awm na, zan ani tawhin a thim bok si a, chutia naupang te e tura amah chauh a rawn kal chu mak ka ti lutuk a, "khaw maw i hmel ka lo en chhin, rawn lut teh" ka ti ta ringawt mai a..

A rawn luh chuan naupangte chiah chiah hi ani a, saruak ngal ngat ani bawk a..mak ka ti hle mai a.. Ka rilru chuan " a Lu hi ka khawih chhin dawn emaw ni? Khawih tlang ta duak mai ila engtinnge ka tih tak ang?" tih te ka ngaihtuah nauh nauh a..Engpawh ni se ka tia, huai chhuahin a lu chu ka kutin kan khawih chhin ringawt mai a, mipa naupang tak tak hi a lo ni a...tunge a nih ti a kan zawh chian chuan ek in neitute fapa, pa deuh a an lo enkawl, zanah pawh thlah ngai lem lova amah a e tura kal mai thin hi a lo nia...Hlauvin tlanchhiat san ta ilang chuan ka sawi hrang ve thei ngei ang kha naupangte kha chu...
 
  Biak In hrang Finfiahna :-

Vawikhat leh thung chu kan camping chhuah hlim hlol ani a, Aizawl le Silchar inkar khaw pakhat (Khaw hming thup mai ang) ah hian ka zin a..Ka zinna khua ah chuan mi te sawi huai huai leh trih "Biak in hrang" an tih mai chu a awm a..An sawi dan tak phei chuan chu Biak in chhung a KTP ho Guitar dah chu zanah hian a rawn inperh ri chheng chheng ang hian ri te an hre thin ani awm a..Camp chhuak thar te ka ni bawk a, Pathian in chutia hrang anga an sawi chu ka ngaitheih zawng ani der lo mai bakah engpawh awm se ka um chhuak ang ka ti ve ngat a..Ka thianpa pakhat nen fiah kan tum ta a, zanah pawnthuah te tel lutin kan riak ta a..

Chung lai chu Fur lai ani bawk a, ruah a sur nasa thei hle in thli a thaw nasa em em bok a..Ka thianpa nen chutia kan mu dun chu chhun lampang a kan hah deuh bawk nen reilote ah chuan kan muhil siah siah nghal mai a.. Mahse, zan laiah chuan chutia ka muhil chu engemaw ri hian min ti harh ta thut mai a..Kan ngaihthlak chian nak chuan an sawi ang ngei chuan Guitar ri ang deuh, ri chheng chheng ang ri ngei chu ka hre ve ta...

ka thianpa kan en lah chuan a lo la muhil tui nasa mai bawk si avang chuan mahni a va fiah mai ka rilruk ta a..Chu mi zan chuan Current a awm lo kher kher mai bakah kan inpuahchahna a tha vak lo bok nen Light lampang pawh engemaw trul thut a hman mai tur engmah ken luh nachang kan lo hre lem lova, Meizial zu thin mi ka nih avang chuan ka ipte ah chuan ka Lighter a lo awm hlauh mai a, ka lighter nen chauh chuan ri rawn kalna lampang chu ka pan hnai ta then then mai a...

Ka Lighter nen a kan en kual vel ngial pawh chuan KTP Guitar chu a awmna pangaiah lo la awm rengin tumah a perh tu awm reng reng ka hmu si lova..mahse ri chu a la awm reng bawk si..CHutia ri chu kan ngaihthlak chian vang vang chuan Biakin chhung atang ni lovin Biakin hnung lam atanga rawn kal niin k hre leh ta zawk a.. Biakin hnung lam pan chuan keimahin ka lighter nen chuan ka chhuak phei leh ta hnak hnak mai a..Ri chu a la awm ngei a, ka pan hnai zel a, ka han enchian nak chuan Biakin ban pakhat a Electric Wire bawr nuaih chu thli in a chhem rik vang a lo ri nuaih nuaih hi a lo ni a... Tichuan chu Biak in hrang chu thli chhem rik angin ka conclude ta ani...

 In hrang Finfiahna :-

Mizoram Khawchhak lama khaw lian ve tak pakhat ah hian mi te trih tak In Hrang an tih mai hi a awm a...Ka zin remchan lai ani kher bawk nen fiah chu ka chak leh ta hle mai a..A in awmna chu a veng hmawr lampang anih avangin a reh hle mai a, a thlang lampang chu ramhnuai ani tawh deuh mai a..A hrang an tih avang chuan an hlau hle ni tur ani, a neitute pon an rauh san na a rei tawh avangin tuma enkawl ani tawh lova, In chhe ve tak anih tawh avang leh a chhungah bungrua engmah a awm mumal tawh loh avangin Tala pawn an kalh lem lova..Chu In atanga in 4-na vel chhak lamah chuan kan chhungte pakhat hi an awm ve a..


Anni pawh chuan an hlauh avangin veng dangah an lo riak chhuak vek hi a lo nia...In hrang nen a kan chhungte in inkar a indang te pawh chu pakhat mah riak ngam an awm lo..Kan chhungte chu an in a riah luh ka dil a, fiah tur chuan ka riak lut ve ta a.. Dar 12 vel thleng chu TV te ka en a, ka film en te an zawh fel chuan keimahin in hrang an tih lamah chuan chhuk thlak ka rilruk ta a..Zan a thiangin Thla a eng khawp mai a, Ui an "uu" chuah chuah bawk a..In hrang lam ka riahna atanga kan thlir chuan Chhawihfa hi an inzui kual duah duah a, an thlawk kual duah duah mai a...Zawi muang in chu in hrang an sawi lamah chuan ka chhukthla ta hnak hnak mai a..


A hmun ka zu thlen thlak chuan Chhawihfa thlawk nuaih nuaih pawh chu an bo diak mai a, hmuh tur reng an awm tawh lo..Kawngka Tala a an kalh lem loh chu ka zu hawng ta phawt mai a...a chhungah chuan ka lut ta a..Light Switch engmah awmna ka hriat si loh avang chuan a thim rem rem hle mai a, engmah ka hmu thei lo tawp ani ber mai..Inchhung chu reilote hnuah chuan a rawn ri ta nuaih nuaih mai a..

Engemaw ni le ti a kan ngaihthlak chian nak chuan Sazu tam lutuk hi an lo tlan ri nuaih nuaih hi a lo ni a..Khatiang em em a sazu tam hmun khata awm kha ka la hre kher lovang.. A thren ka ke bul velah te an rawn vak neuh neuh a, ka pheikhawk te pawh an rawn seh thuak thuak in ka hria..Chutia sazu ho ka ke in kan pet vel lai chuan kawngka chu vawilehkhatah a rawn in bawh hawng thruai mai a..Ka hlau ve deuh nge ni ka che chang ngam ta bik mang lo..


Ngawi reng chuan enge niang aw tiin han en chian ka han tum a..a thim bok si..Engemaw thil ruangam lian tak, a thim lutuk avanga a hmel ka hmuh chian theih si loh chu kawngkhar lam atang chuan ka lamah chuan zawi muang chuan a rawn phei dun dun tih zawng chu ka hriat theih ani.. A rawn phei zel a, ka hmai bul hnai set sawtah chuan a rawn thaw ri huam huam ta mai a, rap awm tak ani..khatiang em em a hlauhawm kha ka la tawng ngai lo..Ka tiril ah hian min man ni berin ka hria..thlanfim in min bual nghal zawih zawih a..

Thih leh thih dam leh dam ti in ka han au ta tuarh mai a..chutia ka au veleh chuan hmanhmawh lutuk in a rawn luhna kawngka lamah chuan a tlan chhuak leh ta a..keipawh chuan enge anih hriat chian tumin ka tlan chhuak ve ta nghal a, thla eng hnuaia ka han en chian nak chuan Sakawr ei tur vel zawng a rawn lut a lo ni awm a, ka hlauh ang chiah khan min lo hlau ve ni ngei tur ani..Ka  nuih te pawh a ti za lek lek zawk a,tichuan ka riahna lam chu ka pan chho leh ta ani..Tichuan chu In hrang an tih chu Sazu le Sakawr ah ka puh thlu leh ta hmiah mai ani..


IB Hrang ah ka riak :-

Tum khat chu Election laiin kan chhungte pakhat thingtlang bial a in candidate ve tur zuiin khaw pakhat panin ka chhuak ve a..Eng eng emaw buaipui tur neuh neuh a awm avangin Candidate tur pa  kal hma chuan keimahin ka va kal hmasa zawk a..Ka zui e ka ti tak na in aman min rawn zui zawk anih chu..Chhungte in han thlenna tur mai ka hriat loh avangin an khua a IB awm chu ka pan ta chawt a..IB chu trawng ve tak hi ani tawh a..Chawkidar pakhat upa lam ve tawh tak hian a lo enkawl hi alo ni a..Chawkidar pa hnenah chuan "Ka Pu, IB ah hian room ruak te a awm em? Zanin chiah riah ka duh a" ka ti ta a..
 
Chawkidar Pa chuan " Room luah lai engmah a awm lova, i duh phawt chuan i riak dawn ania, mahse i riak peih ngut ange maw? engemaw ri neuh neuh a tam ania" a ti ta a..Kei chuan "A khai!! a ho em mai, ka hlau ve lem love, fiah te pawh a chak awm zawk chu"..ka tih sak mai a..Nui pah chuan "Chu tia i tih tlat chuan le, mahse hei ka room bula room luah loh kawngkhar hi kalh lovin ka dah anga, zanah i rawn insawn duh tak leh min kaitho kher lovin i rawn mu mai dawn nia" ati ta a..Keipawh chuan nui chungin " A that hlauh chu" ka ti ve mai bawk a.. Tichuan riak lut tur chuan ka bag te nen ka in khai chho ta a, room ruak vek anih avangin room nawm hmel ber ka tihna ah chuan ka inpulut ta hmiah mai a..
 
Mahni chauh a awm ka nih bawk avang chuan tih tur a awm lo hle mai a..A sen chi ka pai chu ka phawrh a, pack 2 chiah ka pack tih ah chuan in chung lam atang chuan a rawn ri hruk hruk mai a..Ka zu no ka dah thla a, uluk taka kan ngaihthlak chian chuan tu emaw in thir rit tak hnuk ri hruap hruap ang hian ka hre ta a..

Ri ka hriat veleh chuan in chung lamah chuan Torchlight nen ka tlan chho nghal a, in chung ka thlen chuan ri chu a reh hmiah mai a, tumah hmuh tur reng an awm lo.."Ah!! engmah pawh a awm hrep loh hi" tiin ka chhuk leh ta a, ka chhuk deuh chiah reilote hnu ah chuan a ngaite bawkin a rawn ri leh hruap hruap mai a..Kha ri zet kha chu ni danga sazu te, thli te ka puh ang ngawt kha chu ani tawh lo tih ka hrechiang khawp mai..
 
A chhan chu sazu te reuh te in khatiang a thil rit kha a hnuh rik zo a rinawm loh a, thli pawh a thleh chhin eih lo bawk hemi zan hian..Chuvang chuan a mak ka ti ve hle a...Amaherawhchu, ka dawih em em vak loh bawk nen han inthiar chhuah ngawt nachhan tur chuan a ho lam deuh ka ti a..

Inchungah te chuan a duh ang angin ri mahse inchhung a rawn luh lem loh chuan insawn chhuah kher a ngai love ka ti rilru a..Mut zai ka rel ta zawk a,,Mahse ri chuan min tih buai rei ve em avang chuan ka muhil thei ta der lo mai a..Khum atang chuan tho chhuakin ka kuhva lei te kan ei leh te te a, ka bag chhunga ka meizial te ka phawrh chhuak a, ka zu khu ta luih luih mai a..Chutah tak chuan thil mak lutuk a thleng ta...Chutia meizial kan zu zo chu Dustbin ka hmuh remchan loh avangin chhuatah chuan ka meizial bung chu ka paihthla ta a..

Chutia ka paihthlak chiah chuan mak lutuk tak maiin ka meizial bung paihthlak chu tennis ball ang mai hian chhuatah chuan sawt (Bounce) in keimah chu min rawn vawm kir leh ta anih chu!! Chair ah ka thru a, ka thrutna kha a hniam lo hrim hrim a, engti kawng zawng mahin kha meizial bung kha a rawn sawt kir thei lo tih ka hria..Chutah zet chuan "E khai!! kan thlahrang a chu inchhungah pawh a rawn lut tawh anih dawn hi..awm turin min duhlo aniang..ka chhuak mai zawk ange thil tha lo a thlen hma in" tiin a zan a zan chuan Chawkidar in lamah chuan ka in suan chhuak ve ta ani...

A tuk ah chuan Aizawl lam atangin ka thianpa pakhat hi a rawn thleng ve leh a, IB ah chuan riahpui ah min sawm a.kei chuan a hma zan a riah ka tum tawh thu leh riahna chi a nih lem loh thu te ka hrilh a..Ani lah pek chuan min nuihzat ang reng khawp mai a "Khai!! thianpa, i va dawih awm ve,room leh khum nuam zawk lehnghal.. hetiang thil hi engmah ka awih ve lo asin" ati a..Kei chuan "Nia, chutia i tih tlat dawn chuan han riak ta che, i riah peih loh chuan zanah hetah chawkidar awmna lamah hian ron riak thla mai rh,.hei ka riahna bulah pawh khum ruak a awm hi" ka ti ta a..Tichuan IB lam chu engemaw chen kan inkawm hnu chuan riak turin a chho ve ta a..
 
Tichuan kei chu rei lote hnu ah chuan ka muhil nghal mai a, zan lai dar 1,2 vel bawr chuan kawngka chum ri bur bur hian min kaitho a, ka va hawn nak chuan ka thianpa chu hlau lutuk hmel pu in a rawn tre chul mai a, kei lah pek chuan ka tawn vek tawh hnu tho anih avangin engmah zawt lem lo chuan khum ruak chu ka kawhhmuh mai a..Ani lah hlau lutuk chu ka khum a tawt a tawt a ron inrawlh luh ve phet chu a tum a..Ka tetlai atanga midang mutpui thiam miah lo ka lo ni kher bawk nen, ka thin a ti rim lek lek mai a..Mahse min ngiat nasat em avang chuan khum ruak chu ka khum nen a dawhzawm a mut ka phalsak ta ringawt mai a..tichuan zanah chuan Patling pahnih chu mahni a mu ngam lo chuan kan mu dun ta ringawt mai ani...